DC MLINGA AWAPONGZA MADEREVA BODABODA KWA KUDUMISHA AMANI

Imewekwa:: November 10th, 2025

Mkuu wa Wilaya ya Liwale, Mheshimiwa Goodluck Mlinga, amewapongeza madereva wa pikipiki (bodaboda) katika Halmashauri ya Wilaya ya Liwale kwa kudumisha amani wakati wote wa mchakato wa Uchaguzi Mkuu wa Urais, Wabunge na Madiwani uliomalizika hivi karibuni.

Mheshimiwa Mlinga ametoa pongezi hizo leo katika mkutano na madereva hao uliofanyika eneo la Mti Mkubwa, Kata ya Nangando, akiwa ameambatana na Kamati ya Ulinzi na Usalama ya Wilaya (KUU). Katika hotuba yake, aliwahimiza madereva hao kuendelea kuilinda amani na kujikita zaidi katika shughuli za uzalishaji mali, ikiwemo uendeshaji wa pikipiki na kilimo, ili kujipatia kipato halali na kuboresha maisha yao.

Aidha, Mhe. Mlinga aliwataka madereva wa bodaboda kuwa waangalifu na kuepuka kutumiwa na wanasiasa wenye maslahi binafsi, akisisitiza kuwa serikali inaendelea kuwapa kipaumbele kupitia fursa mbalimbali za kiuchumi, ikiwemo mikopo ya asilimia 10 ya mapato ya ndani ya halmashauri inayotolewa kwa vikundi vya vijana, wanawake na watu wenye ulemavu.